Avropa liqası

Unay Emeri: “Qarabağ”la matçda onlara şans verəcəyəm”

01.12.2018 , 09:28

“Komandamızın “Vorskla” ilə oyundakı çıxışından razı qaldım. Bu qarşılaşma meydana az çıxan futbolçulara şans vermək baxımından önəmli idi”. Bu sözləri “Arsenal”ın baş məşqçisi Unay Emeri Avropa Liqasının qrup mərhələsinin V turunda səfərdə “Vorskla”ya qalib gəldikləri matçı dəyərləndirərkən deyib.

Emeri ötən gecə baş tutan qarşılaşmada fərqlənən gənc futbolçular – Smit Rou və Co Uillokun çıxışından razı qalıb, onlara “Qarabağ”la qrup mərhələsinin son oyununda şans verəcəyini açıqlayıb: “Vorskla” ilə qarşılaşmada müntəzəm bizimlə məşq edən gəncləri sınadım. Rou artıq məsuliyyət dərk edir, oyunu öz üzərinə götürməyi bacarır. O, digər gənc futbolçulara örnəkdir. Qrup mərhələsini həm ilk, həm də ikinci pillədə başa vura bilərik. Ancaq “Qarabağ”la qarşılaşmada onlara şans verəcəyəm. Oyun qrafikimiz sıxdır. Ona görə də bizimlə olan gənc futbolçulara şans vermək önəmlidir”.

Qeyd edək ki, “Arsenal” – “Qarabağ” matçı dekabrın 13-də keçiriləcək. London klubu hələ ötən turdan pley-offa vəsiqəni təmin edib. “Qarabağ” isə dünən “”Sportinq”ə böyük hesabla məğlub olmaqla qrupdan çıxmaq şansını itirib.

Son yazılar

Yuxarı