Qadın voleybolçular arasında Azərbaycan Super Liqasının 2016/2017-ci illər mövsümünə yekun vurulub.
Korner.az-ın məlumatına görə, “Telekom” klubu son turda “Lokomotiv”i 3:0 hesabı məğlub edərək, qızıl medalı qazanıb. Turun son qarşılaşmasında meydana çıxacaq “Azərreyl” “Azəryol”la görüşün nəticəsindən asılı olmayaraq, ötən il qazandığı titulla vidalaşıb.
Qələbə sayında rəqibi üçün əlçatmaz olan “Telekom” məhz bu göstəriciyə görə tarixinin ilk çempionluğunu rəsmiləşdirib. “Telekom” 16 oyunda 13 qələbə qazanıb ki, bu “dəmiryolçular”dan 2 qalibiyyət çoxdu.
“Azəryol” çempionatın axırıncı qarşılaşmasına kimi artıq bürünc medalı özünə təmin edib.
Mövsümü aktivində 12 xalı olan “Lokomotiv” 4-cü, cəmi 1 set qazanan Gürcüstan millisi isə sonuncu pillədə başa vurub. (cbcsport.tv)