“İnter”in hücumçusu Baçana Sxadadze klubunun rəsmi saytına müsahibə verib. Korner.az həmin müsahibəni sizə təqdim edir.
– Estoniya klubuna qarşı ilk matçda “İnter” kifayət qədər inamlı futbol sərgilədi və bu da öz əksini rəqibin qapısına 5 cavabsız top keçirilməsində tapdı…
– Deyim ki, 5:0 hesabı oyuna görə oldu. Bundan başqa, daha çox qol vura bilərdik. Düşünürəm ki, oyununuz tamaşaçılarda xoş emosiyalar oyatdı, elə bizə də belə futbol sərgiləmək və belə hesabla qalib gəlmək çox xoşdur. Rəqib var gücüylə bizə qarşı müqavimət göstərirdi, lakin həmin gün bizə praktiki olaraq düşündüklərimizi reallaşdırmaq nəsib oldu və yekun nəticə meydançada baş verənləri əks etdirdi.
– Maraqlıdır, oyundan öncə qarşılaşmanın belə böyük hesabla yekunlaşacağını təxmin edə bilərdiniz?
– Matçın başlanmasına qədər rəqibimizn oyunlarına baxmışdıq. Etiraf etmək lazımdır ki, bizə rəqibin istər güclü, istərsə zəif tərəflərini yaxşı öyrənmək mümkün oldu. Biz kifayət qədər diqqətli hərəkət etdik və fikrimcə, belə oyunla komandamız nəinki “Trans”a, hətta istənilən rəqibə qalib gələ bilərdi. Oyunun başlanmasına qədər yekun hesab barədə düşünmürdük, böyük istək və fədakarlıqla oynamaq vacib idi, axı bu faktorlar bizə səfər matçında kömək etməliydi. “Trans”ı zəif rəqib hesab etmirəm, çünki Avropa Liqasında zəif rəqiblər olmur. Avropa Liqasının istənilən matçında qələbəyə nail olmaq üçün maksimum dərəcədə çalışmaq lazımdır.
– Sabah “İnter” “Trans”la cavab qarşılaşmasını keçirəcək. İlk qarşılaşmada böyükhesablı qələbə cavab oyununda komandanın istəyinə və motivasiyasına təsir göstərməyəcək?
– Dünən bu barədə danışmışıq. Bizə mütləq ilk matçı, 5:0 hesabını unutmaq və təmiz səhifədən oynamaq lazımdır. Komandaya gözəl oyun göstərmək və vəziyyətlərdən istifadə etmək lazımdır. O zaman ikinci oyunda da mütləq uğur əldə edəcəyik.
– İkinci mərhələdə “İnter”i Yunanıstanın “Asteras” komandasının simasında daha ciddi rəqib gözləyir. Bu klub barədə nə deyə bilərsiniz?
– Səmimi desəm, növbəti rəqib barədə “Trans”la matçdan sonra danışmaq istərdim. Amma istənilən halda, qeyd etmək lazımdır ki, yunan komandası çox güclüdür. Bizə oyunlara yaxşı hazırlaşmaq və artırmaq lazımdır.
– “Trans”la oyun sizin üçün də uğurlu alındı, dubl etdiniz. Buna dostlarınız və qohumlarınız necə reaksiya verdilər? Yəqin təbriklər çox idi…
– Əlbəttə. Hamı təbrik edirdi, bizimlə birlikdə sevinirdi. Belə reaksiya stimul verir. Xoşdur ki, insanlar baxırlar, həyəcanlanırlar, dəstəkləyirlər. Təbriklərə görə hamıya minnətdaram, istərdim ki, belə nəticələrlə irəlidə də hamını sevindirim.
– Avrokuboklarda “İnter”in qarşısında maksimal tapşırıqlar qoyulub. Necə düşünürsünüz, komanda məqsədinə çata biləcək? Klubun turnirin qrup mərhələsinə düşmək şansı barədə nə deyə bilərsiz?
– Bilirsiniz, burada püşkdən çox şey asılıdır. Bununla belə, meydançaya çıxmamışdan öncə komandaların şansları həmişə bərabər olur. İrəlidə bizi Yunanıstandan ciddi rəqib gözləyir və bu komandayla matçlarda özümüzü göstərməyə çalışacağıq.
