Sənan Qurbanov: “Pis günləri geridə qoymaq istəyirik”
14.10.2018 , 11:58
“Milli komandaların oyunlarına görə çempionatda yaranan fasilədən maksimum istifadə etməyə çalışdıq. Bilirsiniz ki, çempionatda vəziyyətimiz yaxşı deyil, xallarımızın sayı azdır. Futbolçuların “Səbail”ə qarşı keçirdikləri oyundan razı qaldım. Hərəkətlilik, verilən tapşırıqların yerinə yetirilməsi xoşuma gəldi. Məşqlərdə çalışırıq, yetərincə işlər görürük. Qarşıdakı oyunlarda maksimum nəticələr qazanmağa məcburuq. Dövərəyə yaxşı start verib, pis günləri geridə qoymaq istəyirik. Bunun üçün addımlar atılır”. Bu sözləri “Qəbələ”nin baş məşqçisi Sənan Qurbanov “Səbail”ə qalib gəldikləri yoxlama oyununu dəyərləndirərkən deyib.
Gənc mütəxəssis uğursuz çıxış davam edəcəyi təqdirdə istefaya göndəriləcəyi ilə bağlı yayılan xəbərlərə münasibət bildirib: “Əlbəttə, yayılan xəbərlərə normal yanaşıram. Məğlubiyyət varsa, bunun günahkarı mənəm. Amma yenə deyirəm, hələ ki, rəhbərlik məni saxlamağa qərar verib. Qarşıdakı günlərdə nə olacağını bilmək olmaz. Yaxşı nəticələr qazanaq, sonrasına baxarıq”.
Sənan Qurbanov cəza tədbiri olaraq, hansısa futbolçunun əvəzedici komandaya göndərilmədiyini açıqlayıb. O, əlində olan futbolçulardan maksimum yararlanmaq istədiyini söyləyib: “Hal-hazırda yenilik yoxdur. Əlimizdə olan futbolçulardan maksimum yararlanmağa çalışırıq. Bu gün uşaqlar özlərini yaxşı tərəfdən göstərdilər. Həm taktiki, həm də texniki tərəfdən verilən tapşırığı yerinə yetirdilər. Qarşımızada zaman var. Məşqlərdə də futbolçuların durmuna baxacağıq”.
