Topaz Premyer Liqasında XXV turun “Zirə” – “Qarabağ” (1:2) oyunundan sonra keçirilən mətbuat konfransında Ağdam klubunun baş məşqçisi Qurban Qurbanov jurnalistlərin suallarını cavablandırdı.
O, əvvəlcə görüş barədə fikirlərini bildirdi…
– Maraqlı oyun oldu. Hər iki komanda ən yaxşı oyunlarından birini göstərdi. Futbolçularımı təbrik edirəm. “Zirə”yə uğurlar arzulayıram. Son vaxtlar işləri yolunda getməsə də, bəzi oyunlarda məğlub olmaq haqları deyildi. Bu gün fərqli komanda gördüm. Rəqib çox yaxşı çıxış etdi. Belə hallar çox komandalarda olur. Həvəsdən düşməmək lazımdı.
– Start heyətində bir neçə dəyişikliklər var idi. Bunu növbəti matçlarda da davam etdirəcəksiz?
– Elə də ciddi dəyişikliklər deyildi. Miçelin ayağında ağrı var idi. Bütün oyunlarda 1-2 oyunçuya istirahət verə bilərik. Zədə olsa, hansısa futbolçular meydana çıxmayacaq.
– “Qəbələ” ilə son tur oyununun Bakıda keçiriləcəyi deyilir…
– Elə də məlumatım yoxdu. Yazılanları oxumuşam. Bizim üçün fərqi yoxdu. Onların haqqıdı evdə oynamaq. Bizim də borcumuz meydana çıxmaqdı. Gedib oynamağa hazırıq. Onlar bura gəlsin, bizim üçün rahat olsun kimi düşünmürük.
– Ramil Şeydayevin müqavilə ilə məxsus olduğu “Trabzonspor”un transfer qadağası ləğv edildi. Belə olan halda, onun klubunuzda qalmaq ehtimalı artırmı?
– Müqaviləsi başa çatacaq. Hələ ki, danışıqlarımız olmayıb. Nə Ramillə, nə də klubu ilə danışmışıq.
