“Ona dedim ki, heç olmasa sən sərtlikdən danışma” – Samir Abasov
10.11.2018 , 22:06
Topaz Premyer Liqasında XI turun “Neftçi” – “Zirə” (2:2) oyunundan sonra keçirilən mətbuat konfransında qonaq komandanın baş məşqçisi Samir Abasov jurnalistlərin suallarını cavablandırdı.
O, əvvəlcə matç barədə fikirlərini bildirdi…
– Bu gün qalibiyyət yerinə düşərdi. Təəssüf ki, bu, baş vermədi. Lider komandaya qarşı belə oynadıq. Uşaqlara dedim ki, qeyri-adi heç nə etmədik. Sadəcə öz oyunumuzu oynadıq. Yaxşı komanda qurulması üçün vaxt lazımdı. Bugünkü oyunumuz yetərlidi. Uşaqlar can qoydular. Bu, o demək deyil ki, məqsədimiz “Neftçi”ni saxlamaq idi. Yox, əvvəlki matçlarda da belə oyamışdıq. Vəziyyətimiz yaxşı deyil. İki gün bundan qabaq məşqdə heç nədən kamal Mirzəyev zədələndi, dünənki məşqdə ilkin Qırtımovun ayağı burxuldu, oyundan öncə isinmə hərəkətləri zamanı Dilan əzələsini dartdı. Oyunun gedişatında Anarın belə olmağı… Bilmirən, bu nədi. İşimiz həddən artıq çətindi. Xahiş edirəm ki, bizi başa düşsünlər. Belə vəziyyətdə futbolabənzər nəsə etməyə çalışırdıq.
– Sanki “Neftçi” ilə oyunlarda xüsusi motivasiyanız olur, daha çılğın görünürsüz…
– Biz qələbə qazanmaq istəyirik. Burda “Neftçi” amili yoxdu. Başqa komanda, belə gedişat olsaydı, bundan da artıq ola bilərdi. Bilmirəm, bu fikirlər hardandı. Əsla belə deyil. Bordinlə oyundan əvvəl də də, sonra da görüşdük. İlk oyunda hər ikimizin etirazları var idi. Bəlkə də mənim səhvim idi ki, başa düşmədən tez reaksiya vermişdim.
– Anar Nəzirovun durumu nə yerdədi?
– Həkimlər onu içəri aparmaq istəsə də, oyuna baxırdı. Hesab 2:2 idi, amma o, bunu bilmirdi. Beyin silkələnməsi olduğu ehtimal edilir. Vəziyyəti yaxşı deyil.
– Kirilo Petrovla nəsə müzakirə edirdiz…
– Prdisin ona qarşı kobud oynadığını deyirdi. Mən də dedim ki, heç olmasa sən sərtlikdən danışma. Belə bir kiçik söhbətimiz oldu.
