Messidən bir ilk – Ronaldoya səs verdi
25.09.2018 , 13:53
FİFA-nın təşkil etdiyi ilin ən yaxşı futbolçusu və məşqçisi seçimində kimin kimə səs verməsi məlum olub
“Barselona” və Argentina yığmasının kapitanı Lionel Messi futbolçulardan ilk pillədə Luka Modriçin adını qeyd edib. O, 2-ci yerə Kilian Mbappeni, 3-cü yerə isə Kriştiano Ronaldonu layiq görüb. Beləliklə, Messi ilk dəfə Ronaldonun adını 3-lüyə daxil edib.
İlin ən yaxşı baş məşqçisi seçimində isə Messi bu ardıcıllığı edib: 1.Ernesto Valverde, 2.Xosep Qvardiola, 3.Massimiliano Alleqri.
“Yuventus”un və Portuqaliya yığmasının futbolçusu Kriştiano Ronaldo isə ilin ən yaxşı futbolçusu seçiminə Rafael Varanı 1-ci, Luka Modriçi 2-ci, Antuan Qrizmannı isə 3-cü yerə layiq bilib. Ronaldo ilin ən yaxşı baş məşqçisi adına Zinəddin Zidanı layiq görüb. Onun seçimində Massimiliano Alleqri 2-ci, Didye Deşam 3-cü olub.
İlin ən yaxşı futbolçusu adına layiq görülən Luka Modriçin seçimi isə belə olub: Futbolçular – 1.Rafael Varan, 2.Kriştiano Ronaldo, 3.Antuan Qrizmann. Baş məşqçilər – Zlatko Daliç, Didye Deşam, Zinəddin Zidan.
