Kamran Ağayev: “Məni tənqid edənlər millidə öz komandalarının qapıçısını görmək istəyir”

Bu sözləri “Keşlə”nin kapitanı Kamran Ağayev Topaz Premyer Liqasının 8-ci turunda “Zirə”yə 1-0 hesabı ilə qalib gəldikləri oyundan sonra deyib. Təcrübəli əlcək sahibi oyun barədə fikirlərini bölüşüb: “İlk hissədə qol epizodlarımızdan yararlana bilmədik. Qoldan sonra əks-hücumlarda fərqlənə bilərdik. Son pillədə olduğumuz üçün üzərimizdə təzyiq var idi. Davam etmək lazımdır. Baş məşqçimiz avrokubok matçımızdan sonra komandaya gəlib. Nəticə əldə etmək istəyiriksə, çalışmaq lazımdır. “.

Kamran Ağayev millimizin heyətində Farer adaları və Malta ilə oyunlarda tənqid edilməsinə münasibət bildirib: “Məni kim tənqid edirdi? Futboldan başınız çıxır? Məni tənqid edənlər millidə öz komandalarının qapıçısını görmək istəyir. Malta ilə oyunda qol buraxdığımız zaman çıxışda səhv etmədim. Rüfət Dadaşov əlini mənə söykədiyi üçün top başımın üstündən getdi, tuta bilmədim. Elə bilirdim ki, rəqib futbolçunun əlidir. Sonra bildim ki, öz oyunçumuz idi. İkinci epizodda isə ayağım sürüşdü və mən də topu tutmalı oldum. 9 metrlik cərimə zərbəsindən başqa nəsə olmadı. Azarkeşlər çox şey yaza bilər. Bu gün “Zirə” fanatı yazacaq ki, qapıda Anar Nəzirov dayansın. Yaxşı oynadığımı demirəm, zəif çıxış etdim. 4 oyuna 2 qol buraxmışıq, biri də penaltidən. Heç kəsə ixtiyar verməmişəm ki, məni ələ salsın. Tənqid edənlər çox olub. Bu gün tənqid edən, sabah öpüb-qucaqlayır. Bunlara alışmışıq. Millinin oyunlarında qapıda pis dayanmamışam. Xalqın qarşısında çox oyunlara çıxmışam və hamı məndən ən yaxşısını gözləyir. Normal oyunu da tənqid edirlər. Səhvsiz insan olmur. Bu, oyun deyil ki, kimsə məni kənardan idarə etsin. Milli barədə çox danışmaq istəmirəm”.