.jpeg)
Ötən mövsüm UEFA Çempionlar Liqasında iştiraka görə klublara ümumilikdə 754,1 milyon avro ödənilib.
Korner.az-ın məlumatına görə, ən çox pay finalçılara – "Çelsi" və "Bavariya"nın payına düşüb.
"Münhen Arena" da penaltilər seriyasında "Bavariya"nı məğlub edən "Çelsi"yə 59,935 milyon avro ödənilib. 29,9 milyon – qrup mərhələsində, pley-offda, finalda iştirak ilə əlavə bonusların cəmidir. Qalan 30,035 milyonu isə "zadəganlar" teleyayım hüquqlarının satışından əldə ediblər.
Finalda iştirak "Bavariya"ya 41,730 milyon avro qazandırıb. İştirak, bonus və nəticələrin cəmi 26,9 milyon: yayım satışından isə gəlir 14,830 milyon təşkil edib.
Finalda qələbəyə görə "Çelsi"yə 9 milyon, həlledici oyunda iştiraka görə isə "Bavariya" ya 5,6 milyon çatıb. Finalçıların ardından isə 2011/2012 mövsümünün nəticəsinə görə "Barselona” (40,550 milyon): "Milan" ( 39,864 milyon): "Real" ( 38,434 milyon ): "Mançester Yunayted" ( 35,182 milyon ) və "İnter" (31,569 milyon ) gəlir.
754,1 milyon avro qrup mərhələsində çıxış edən 32 komanda arasında bölünüb. İştirak və nəticələrə görə ödəniş 413 milyon, teleyayım hüquqlarının satış payı isə 341,1 milyon təşkil edib.
Qrup mərhələsinin iştirakçılarının hər birinə minimum 7,2 milyon avro ödənilib. 3,9 milyon onların iştirakı üçün sabit ödəniş kimi, üstəgəl 550 min avro qrup mərhələsində hər oyun üçün – nəticədən asılı olmayaraq – ayrılıb. (cəmi 3,3 milyon).
Qrup mərhələsində qələbə klubun xəzinəsinə əlavə 800 min, heç-heçə isə 400 min avro qazandırır. Ancaq "Real" maksimum 4,8 milyon qazandı.
1/8 finala vəsiqə qazanmış 16 komanda 3 milyon, 1/4 finalçılar isə əlavə 3,3 milyon qazanıblar. Yarımfinalçılara əlavə 4,2 milyon çatıb.
İlk 3 mərhələni keçə bilməyən klublar həmrəylik haqqı kimi pul alıblar. Qrup mərhələsinə düşə bilməyən çempionlar 200 min avro qazanıblar. İlk 3 təsnifat mərhələlərini keçə bilməyən komandalar iştiraka görə 130 min avro alıblar. Pley-offda iştirak edən 20 komandaya isə nəticədən asılı olmayaraq 2,1 milyon sabit mükafat ayrılıb.
