“Daha aqressiv olmalı idik” – Ayxan Abbasov
18.08.2018 , 23:06
“Bizim üçün çempionatın ilk oyunu idi. İlk oyunlar hər zaman ağır olur”. Bu sözləri “Zirə”nin baş məşqçisi Ayxan Abbasov deyib.
Qəsəbə təmsilçisi Topaz Premyer Liqasının II turunda öz meydanında “Keşlə” ilə bərabərə qalıb.
Oyundan sonra baş tutan mətbuat konfransında iştirak edən mütəxəssis fikirlərini bildirib: “Keşlə” heyətində bəzi dəyişikliklər etmişdi. İlk hissədə qol imkanlarımız oldu, fərqi 3-əçatdıra bilərdik, amma alınmadı. Onu da bilirdik ki, “Keşlə” standart vəziyyətlərdə bizə çətinlik yarada bilər. Rəqib ilk qoldan sonra daha həvəsli oynadı. Qələbə qazanmaq istəsək də, alınmadı. Çempionat çox çətin keçəcək, axsamamağa çalışacağıq”.
– Son dəqiqələrdə buraxılan qola görə müdafiəçilərinizi günahlandırmaq olar?
– Deməzdim. Rəqibin itirəcəyi heç nə yox idi və biz əks-hücumlar edirdi. Müdafiəçilər bu gün pis oynamadılar. Rəqib üstümüzə gəldiyi üçün daha aqressiv olmalı idik. Amma hesabı qoruya bilmədik.
– Anar Nəzirova dəfələrlə xəbərdarlıq etdiniz. Bu, nə ilə bağlı idi?
– Belə hallar olur. Bir zəif oyunu böyütmək olmaz. Ümid edirəm ki, səhvlərini gələn oyunlarda azaldacaq.
– Pərdis çox aqressiv idi. Onu siz motivasiya etmişdiniz?
– Pərdis hər zaman belə olur. Ötən mövsüm bizimlə oyunda müdafiəçilərimizi zədələmişdi. “Zirə”yə gələndə özünə qarşı haqsızlıq olduğunu düşünürdü. Ancaq onunla danışdım, sakit olmasını istədim. Pərdisdən hər zaman aqressiv oyun gözləmək olar.
– İkinci hissədə hiss olundu ki, komandada hücumçu problemi var.
– Qısa ötürmələrlə rəqibin cərimə meydançasına daxil olurduq. Cinah oyunçularımız da hücuma qoşulurdular. Ola bilər, oyunun sonuna yaxın yorğunçuluq var idi. Yorğunçuluq olanda futbolçular düzgün qərar verməkdə çətinlik çəkir.
