Futbol

Coşqun Diniyev: “Pulu üstün tutsaydım, “Qarabağ”da ehtiyatda oturmağı qəbul edərdim” – MÜSAHİBƏ

14.01.2019 , 20:04

“Qarabağ”dan getmək öz qərarımdır. Çünki son vaxtlar az oynayırdım və ehtiyatda daha çox qalırdım”.

Bunu “Report”a müsahibəsində “Qarabağ”dan ayrılaraq “Sabah”a transfer olunan Azərbaycan millisinin futbolçusu Coşqun Diniyev deyib.

23 yaşlı dayaq yarımmüdafiəçisi bildirib ki, Ağdam klubunda ehtiyatda qalmaqdansa, başqa komandada oynamağı üstün tutub: “Daim oynamalı olduğum bir yaşdayam. “Qarabağ”da ehtiyatda oturmaqdansa, başqa komandada oynamaq daha məqsədəuyğundur. Klub rəhbərliyi ilə danışdım, davamlı oynaya biləcəyim bir yerə getmək istədiyimi söylədim. Onlar da məni anlayışla qarşıladılar və qarşılıqlı razılaşma əsasında ayrıldım”.

– 2015-ci ilin iyunundan başlayan “Qarabağ” karyeranızı necə dəyərləndirirsiniz?

– Futbolçu karyeramın ən gözəl illərini “Qarabağ”da keçirmişəm. Orada baş məşqçimiz Qurban Qurbanov, kapitanımız Rəşad Sadıqov və digər komanda yoldaşlarımdan çox şey öyrəndim. Komanda ilə çempionluqlar yaşadım, Avropa Liqası və Çempionlar Liqasında böyük təcrübə qazandım. Orada mənə verilən dəstəyi hər zaman hiss etmişəm. Təəssüf ki, oynamaq üçün az şansım oldu. Bəlkə də, bunun əsas səbəbkarı mənəm, istənilən formada olmamışam. Amma yenə deyirəm, futbolçu daim oynadıqda yaxşı forma toplayır. Ona görə də belə bir addım atdım. Bütün futbol ictimaiyyətinə görmək istədikləri Coşqunu göstərmək üçün “Sabah”a keçdim.

– Niyə məhz “Sabah”?

– İki-üç təklifim vardı. Amma “Sabah”ın adını eşidən kimi bütün fikrim bu kluba yönəldi. Çünki komandanın baş məşqçisi Elşad Əhmədovla bir neçə il öncə “İnter”də çalışmışam. “Sabah”a gəlməyimdə başlıca səbəb baş məşqçi oldu. Həqiqətən də onunla işləmək mənim üçün çox xoşdur. Transfer reallaşmamışdan qabaq klub rəhbərliyi ilə danışdıq. Onların klubun qarşısına qoyuqları missiya, gələcəyə dair planları məni cəlb etdi. Gələcək üçün yaxşı komanda qurmaq istəyirlər. Bütün bunları nəzərə alıb, “Sabah”la razılaşdım.

– Böyük qardaşınız Kərim Diniyevlə ilk dəfə komanda yoldaşı olacaqsınız. Seçiminizdə bu amil də rol oynadı?

– İlk dəfə bir yerdə oynayacağımız üçün çox sevinirəm. Amma yenə də deyirəm: ilk növbədə, Elşad Əhmədov və klub rəhbərliyi ilə danışığım həlledici oldu. Qardaşımın bura gəlməyimdə rolu yoxdur. Amma belə alındığı üçün şadam.

– UEFA-nın tələbinə əsasən, fəaliyyətinin 3 ili tamam olmadığına görə “Sabah” 2019/2020 mövsümündə avrokubokda iştirak edə bilməz. Bu amil seçim edən zaman tərəddüd etməyinizə səbəb olmadı?

– Bunu əvvəldən bilirdim. “Sabah” yeni klubdur. Bütün məsələləri götür-qoy edəndən sonra razılaşmışam. Əsas məsələ komandanın gələcəyidir. Gələn mövsüm avrokuboklara vəsiqə uğrunda mübarizə aparacaq “Sabah”da olmaq mənim üçün bir şərəfdir.

– “Sabah” sizdən əvvəl qış fasiləsində Rəşad Eyubov və Təmkin Xəlilzadəni transfer edib. Həmçinin ötən mövsümün ən yaxşılarından olan Cavid İmamverdiyev buradadır…

– Bəli, “Sabah” bir sıra güclü yerli oyunçular transfer edib. Bu da komandanın hədəflərindən xəbər verir. Çalışacağıq ki, hamının çəkindiyi bir rəqib olaq. Növbəti mövsüm hər kəs tam başqa “Sabah” görəcək.

– “Sabah”a keçidinizə atanız Şahin Diniyevin münasibəti necə oldu?

– Qərar verərkən atamla məsləhətləşdim. O da “Sabah”a keçməyi məsləhət gördü.

– “Sabah” keçməklə daha çox oynamağı nisbətən az qazanmaqdan üstün tutmuş oldunuz?

– Əmək haqqı barədə danışmaq istəməzdim. Əlbəttə, hər bir klubda maaşın məbləğləri arasında fərq olur. Mənim üçün bu yaşda oynamaq puldan önəmlidir. Pulu üstün tutsaydım, “Qarabağ”da ehtiyatda oturmağı qəbul edərdim.

Son yazılar

Yuxarı