.jpg)
“Çempionatın başlamasına qısa müddət qalıb. Biz də artıq hazırlıqlarımızı yekunlaşdırmaq üzrəyik. Buraya gəldiyimiz ilk günlə müqayisədə komandada xeyli irəliləyiş var”.
Korner.az-ın məlumatına görə, bu sözləri “Qəbələ” klubunun baş məşqçisi Fatih Kavlak deyib.
Türkiyəli mütəxəssis komandasının Sloveniya toplanışındakı hazırlıqları haqda fikirlərini klubun rəsmi saytına açıqlayıb: “Təbii ki, bununla yanaşı səhvlərimiz də yox deyil. Xüsusilə də artıq qalib gəlməyə öyrəşməyimiz lazımdır. Qol vurduqdan sonra qələbəni qorumaq vacibdir. Son 2 matçda hesabda irəli çıxsaq da, üstünlüyümüzü sona kimi davam etdirə bilmədik. Amma komandanın potensialını nəzərə alsaq, bu aradan qaldırıla biləcək səhvlərdir. Son bir yoxlama oyunumuz qalıb. O qarşılaşmada bir daha komandanı gözdən keçirib çempionata start verəcəyik”.
Baş məşqçi çempionatın açılış oyununda –“Simurq”la matçda forma geyəcək futbolçuların çox hissəsinin müəyyənləşdiyini bildirib: “Artıq demək olar kı, 10 gün sonra “Simurq”la qarşılaşmada forma geyəcək futbolçuların çox hissəsi dəqiqləşib. Amma qarşıda hələ müəyyən vaxt kəsiyi var. Bu zaman ərzində tam heyəti formalaşdıracağıq. “11-lik”dən kənar qalacaq futbolçuların səviyyəsindən də razıyam. Yəni onlar da istənilən vaxt meydançaya çıxmaq gücündədirlər. Artıq komplektləşmiş bir komandayıq. Burada keçirdiyimiz heç bir oyunda bir “11-lik” 90 dəqiqə mübarizə aparmayıb. Çoxlu əvəzetmələr etmişik ki, bu da komandanın balansını pozub və sözügedən hal nəticəyə təsir edib. Əslində yoxlama matçlarında çoxlu əvəzetmələr etməkdə məqsədimiz də məhz belə halları əvvəlcədən görüb onların həll yollarını tapmaq, səhvləri vaxtında aradan qaldırmaqdır”
