Çempionlar Liqasının qrup mərhələsinin V turunun ilk günündən sonra UEFA reytinqi açıqlanıb
Baş tutan 8 qarşılaşma ölkələrin təkcə xal hesablarının dəyişməsi ilə nəticələnib.
Belə ki, bəzi ölkələr xal aktivini artırsa da, bu qazanc irəliləmək üçün yetərli olmayıb. 10-cu pillədə qərarlaşan qonşu Türkiyə hesabına daha 0,200 xal yazıb. Buna “Beşiktaş”ın “Porto” ilə heç-heçəsi səbəb olub – 1:1.
Azərbaycanın da mövqeyi dəyişməz qalıb. Cari mövsümdə 4,375 xal toplayan ölkəmizin aktivindəkilərin 2,625-i “Qarabağ”ın hesabındadı. “İnter” 0,750, “Zirə” 0,625, “Qəbələ” 0,375 xal qazandırıb. Son 5 ilin nəticələrinə görə hesablanan reytinqdə 19,125 xalı olan Azərbaycan Avropada 22-ci sırada qalıb.
Bu gün meydana çıxacaq “Qarabağ” xal hesabımızı artıra bilər. “Çelsi”ni qəbul edəcək çempionumuz heç-heçə ilə 0,250, qələbə ilə 0,500 xal gətirmək imkanına malikdi. Lakin bu qazanc irəliləmək üçün yetərli olmayacaq. Amma ən yaxın izləyicilərin Azərbaycana yaxınlaşmaması və ya çatmaması üçün xal qazanmaq zəruridi. Çünki Bolqarıstan və İsveç 22-ci sıranı ələ keçirmək imkanına malikdi.
Qeyd edək ki, cədvələ İspaniya başçılıq edir – 96,569 xal.
